សេចក្តីពិតដ៏សំខាន់មួយ :   កុំត្រឹមតែស្ដាប់ព្រះបន្ទូលរបស់ព្រះយេស៊ូវ តែធ្វើតាមអ្វីដែលព្រះអង្គមានបន្ទូលដែរ។

​

សកម្មភាព : ព្រះយេស៊ូវមានបន្ទូល

​

របៀបលេង :

១) ប្រាប់យុវជនឱ្យក្រោកឈរ បំបែកគ្នា និងមើលមកកាន់គ្រូ។ និយាយ៖ "សូមយកចិត្តទុកដាក់ស្ដាប់ និងធ្វើតាមការណែនាំរបស់ខ្ញុំ។ អ្នកឈ្នះ គឺអ្នកដែលស្ដាប់ និងធ្វើតាម។"

២) ដាក់លក្ខខ័ណ្ឌ៖

• ពេលគ្រូនិយាយ មានពាក្យថា "ព្រះយេស៊ូវមានបន្ទូលថា" សូមគ្រប់គ្នាធ្វើសកម្មភាព។

• បើគ្រូនិយាយ មានពាក្យថា "យ៉ាកុបនិយាយថា" សូមប្រុសៗធ្វើសកម្មភាព។

• ពេលគ្រូនិយាយ មានពាក្យថា "រ៉ាជែលនិយាយថា" សូមស្រីៗធ្វើសកម្មភាព។

    គ្រូអាចបន្ថែមលក្ខខ័ណ្ឌនៃការលេង កំឡុងពេលលេងហ្គេមដូចជា៖

• បើគ្រូនិយាយថា "សារ៉ានិយាយថា" សូមកុំស្ដាប់តាមពាក្យដែលគ្រូនិយាយ ហើយត្រូវសើច និង និយាយថា៖ "តែខ្ញុំចាស់ពេកហើយ!"

• ពេលគ្រូនិយាយថា "យ៉ូណាសនិយាយថា" សូមកុំស្ដាប់តាមពាក្យដែលគ្រូនិយាយ ហើយបិទច្រមុះ ខ្លួនឯង ហើយនិយាយថា៖ "ធុំក្លិនឆ្អាបត្រីៗ។"

​

៣) ចាប់ផ្ដើមលេង។ បើអ្នកណាមិនធ្វើសកម្មភាពត្រឹមត្រូវ ឬធ្វើសកម្មភាពខុសពេលវេលា ត្រូវតែអង្គុយចុះ។

៤)  អ្នកដែលនៅឈរ ដល់ចុងក្រោយគេ គឺជាអ្នកឈ្នះ។

​

ក្រោយបញ្ចប់ហ្គេម

សួរ៖  តើវាស្រួល ឬក៏ពិបាក ក្នុងការស្ដាប់តាមការណែនាំរបស់គ្រូ? ហេតុអី?
នៅក្នុងហ្គេម ពេលប្អូនៗមិនបានធ្វើតាមបង្គាប់ តើមកពីប្អូន៖

• ស្ដាប់ខុស?

• មិនយល់?

• ច្រឡំ?

• មិនចង់ធ្វើតាម?

ក្នុងជីវិតពិតយើង តើប្អូនៗអាចរកឧទាហរណ៍ ពីពេលដែលមនុស្សមិនធ្វើតាមការណែនាំណាមួយទេ?

ទុកឱ្យសិស្សលើកឧទាហរណ៍។

 

រួចសួរថា៖ "តើគេលើកហេតុផលអ្វី ពេលគេមិនបានធ្វើតាមការណែនាំ នោះ?"

​

ការរៀនព្រះគម្ពីរ

ថ្ងៃនេះ យើងនឹងបញ្ចប់បណ្ដុំរឿងដែលទាក់ទងនឹង សេចក្ដីអធិប្បាយនៅលើភ្នំ។ យើងនឹងមើលរបៀបដែល ព្រះយេស៊ូវបញ្ចប់ ការបង្រៀនរបស់ទ្រង់។ ព្រះអង្គបានបង្រៀនមេរៀនប្រកបដោយប្រាជ្ញាជាច្រើន។ ឥឡូវនេះ ព្រះអង្គនឹងបញ្ចប់ដោយមានបន្ទូលថា វាជាការសំខាន់ណាស់ ដែលយើងធ្វើតាមព្រះបន្ទូល របស់ទ្រង់។ ដូច្នេះ នៅក្នុងមេរៀននេះគឺ ទាក់ទងនឹងសារៈសំខាន់នៃ ការស្ដាប់បង្គាប់។

​

អាន [ម៉ាថាយ 7:21-29]

​

សំនួរត្រិះរិះ

នៅក្នុងខរ 21 តើព្រះយេស៊ូវមានបន្ទូលថា នរណានឹងចូលទៅក្នុងនគរស្ថានសួគ៌?
អស់អ្នកណាដែលធ្វើតាមបំណងព្រះហឬទ័យរបស់ព្រះបិតា ដែលគង់នៅស្ថានសួគ៌។

​

មិនមែនគ្រប់គ្នាដែលថា ខ្លួនឯងជាគ្រិស្តបរិស័ទនឹងអាចចូលទៅនគរស្ថានសួគ៌នោះទេ។ បើសិនជា​ ព្រះយេស៊ូវពិតជាម្ចាស់របស់យើង ហើយយើងនឹងធ្វើតាមបំណងព្រះហឬទ័យព្រះ។

​

នៅក្នុងខរ 24 តើព្រះយេស៊ូវមានបន្ទូលអំពី អ្នកដែលស្ដាប់ព្រះបន្ទូលព្រះអង្គ ហើយធ្វើតាមនោះថា យ៉ាងម៉េច?
មនុស្សប៉ិនប្រយ័ត្នប្រយែងដែលសង់ផ្ទះខ្លួនឯងនៅលើថ្ម។

​

នៅក្នុងខរ 26 តើព្រះយេស៊ូវមានបន្ទូលអំពី អ្នកដែលស្ដាប់ព្រះបន្ទូលព្រះអង្គ ហើយមិនធ្វើតាមនោះថា យ៉ាងម៉េច?
មនុស្សល្ងីលើ្ង ដែលសង់ផ្ទះខ្លួនឯងនៅលើខ្សាច់។

​

តើយើងគួរសង់ផ្ទះយើងនៅលើអ្វីល្អជាង? ខ្សាច់ ឬថ្ម? ហេតុអ្វី?

សង់ផ្ទះនៅលើថ្មប្រសើរជាង។ ថ្មជារបស់ រឹង ដែលមិនប្រែប្រួលនោះឡើយ។ ខ្សាច់មិនមែនជារបស់រឹងទេ។ ខ្សាច់ងាយស្រួលឱ្យយើងសង់អ្វីពីលើ តែវាមិននៅមាំមួយកន្លែងទេ ហើយអគារនឹងរលំ។

​

តើមានរឿងអីកើតឡើងចំពោះផ្ទះទាំង ២ ខ្នង ពេលមានភ្លៀង និងខ្យល់បក់មក?
ផ្ទះរបស់មនុស្សមានប្រាជ្ញា ដែលសង់នៅលើថ្ម នឹងមិនរលំទេ។
ផ្ទះរបស់មនសុ្សល្ងីល្ងើ ដែលសង់នៅលើខ្សាច់ នឹងរលំបែកបាក់អស់។

​

សាកនឹកគិតថា មានមិត្តភក្តិម្នាក់មករកយើង ដើម្បីសុំយោបល់។ អ្នកនឹងឱ្យដំបូន្មានល្អៗទៅកាន់គាត់ តែពួកគេមិនធ្វើតាមទេ! តើដំបូន្មានរបស់ប្អូន ផ្ដល់ប្រយោជន៍ដល់ពួកគេទេ? ទេ។ តើបញ្ហាម​កពីដំបូន្មាន របស់ប្អូន មិនល្អឬ? ទេ។

តើអ្វីទៅជាបញ្ហា? ពួកគេមិនធ្វើតាមដំបូន្មានខ្ញុំ។

​

ប្អូនមិនអាចជួយនរណាម្នាក់ ដែលគេមិនទទួលពាក្យនៃប្រាជ្ញា ដោយមិនធ្វើតាម អ្វីដែលប្អូននិយាយ នោះទេ។ ដូច្នេះ មេរៀនថ្ងៃនេះគឺ កុំគ្រាន់តែស្ដាប់ព្រះបន្ទូលរបស់ព្រះយេស៊ូវ តែត្រូវធ្វើតាមអ្វីដែល ព្រះអង្គមានបន្ទូលដែរ!

 

សំនួរបង្កប់ន័យ

តើប្អូនគិតថា ផ្ទះតំណាងឱ្យអ្វីនៅក្នុងរឿងនេះ?
ផ្ទះតំណាងឱ្យជីវិតយើង។

​

ចូរនិយាយអំពី គ្រឹះ។ តើអ្វីទៅជាគ្រឹះ?
ទុកឱ្យពួកគេបញ្ចេញគំនិត។

​

គ្រឹះគឺជា អ្វីដែលយើងសង់ពីលើ។ បើគ្រឹះគឺជារបស់រឹង នោះអគារនឹងរឹងមាំដែរ។ បើគ្រឹះខ្សោយវិញ មិនថាអគារនោះធំ ឬស្អាតប៉ុណ្ណាទេ វានឹងមិនគង់វង្សទេ។ មនុស្សយើងគ្រប់គ្នា ក៏កំពុងសាងសង់ជីវិត យើងលើអ្វីមួយដែរ។ ព្រះយេស៊ូវមានបន្ទូលថា ការរស់នៅដែលតាមការបង្រៀនរបស់ទ្រង់ គឺដូចជា អគារនៅលើថ្មអ៊ីចឹង។ តើប្អូនៗគិតថា ព្រះអង្គមានន័យថាម៉េច?

ព្រះបន្ទូលព្រះអង្គជា សេចក្ដីពិត អាចទុកចិត្តបាន និងរឹងមាំ។ បើយើងសង់ជីវិតយើងនៅលើនោះ ជិវិតរបស់យើងនឹងរឹងមាំដែរ។

​

មនុស្សភាគច្រើនចង់រស់នៅក្នុងជីវិតដែលល្អ។ ប៉ុន្តែ តើយើងអាចដឹងថា យើងកំពុងរស់នៅតាមអ្វី ដែលព្រះអង្គចង់ឱ្យយើងរស់នៅ ដោយរបៀបណា? ចម្លើយគឺ ព្រះអង្គបានបញ្ជូនព្រះរាជបុត្រាព្រះអង្គពី ស្ថានសួគ៌មក ឱ្យប្រាប់យើងអំពី បំណងព្រះហឬទ័យទ្រង់សម្រាប់យើង។ បើយើងបានឮព្រះបន្ទូលព្រះ អង្គ ហើយយើងឆ្លើយតបដោយការស្ដាប់បង្គាប់ នោះសេចក្ដីសន្យាដែលយើងមានគឺ  យើងនឹងអាចឈរ មាំនៅចំពោះព្យុះភ្លៀងដែលមាននៅក្នុងជិវិតយើង និងរស់នៅអស់កល្បជានិច្ច។

​

ដូច្នេះ ការសង់ផ្ទះនៅលើថ្ម មានន័យថា ការធ្វើតាមព្រះបន្ទូលរបស់ព្រះយេស៊ូវ។ ការសង់ផ្ទះនៅលើខ្សាច់ មានន័យថា មិនធ្វើតាមព្រះបន្ទូលរបស់ព្រះយេស៊ូវ។ គន្លឹះក្នុងការស្ដាប់បង្គាប់ព្រះយេស៊ូវ គឺស្គាល់ព្រះ អង្គ។ ពេលប្អូនៗកាន់តែស្គាល់ទ្រង់ ប្អូនៗនឹងកាន់តែជឿទ្រង់។ ហើយពេលយើងឃើញថា ព្រះយេស៊ូវល្អ មានប្រាជ្ញា ស្មោះត្រង់ និងមានអំណាចប៉ុណ្ណានោះ យើងនឹងជ្រើសរើសស្ដាប់បង្គាប់ទ្រង់ ដោយចិត្ត សប្បាយរីករាយ ព្រោះយើងដឹងថា នេះជាការល្អបំផុតដែលយើងអាចធ្វើបាន។ ពេលយើងធ្វើដូចនេះ យើងកំពុងតែចាប់ផ្ដើមរស់នៅ តាមដែលព្រះអង្គបង្កើតមកហើយ។

​

ពេលវេលាក្រុមតូច

ពិភាក្សាគ្នា នៅក្នុងក្រុមតូច៖

• តើការស្ដាប់បង្គាប់ព្រះយេស៊ូវ មានសារៈសំខាន់ប៉ុណ្ណា?

• តើអ្វីទៅដែលធ្វើឱ្យការស្ដាប់បង្គាប់ព្រះយេស៊ូវ ពិបាកពេលខ្លះ?

• តើអ្វីដែលជួយឱ្យអ្នកស្ដាប់បង្គាប់ព្រះអង្គ?

​

សង្ខេប
នៅក្នុងបណ្ដុំរឿងនេះ យើងបានឃើញថា ព្រះយេស៊ូវបង្រៀនទៅកាន់ពួកសិស្សថា ពួកគេទទួលពរ ពីព្រះ។ ពួកគេគឺជាអំបិល និងពន្លឺនៅក្នុងលោកីយ៍។ ពួកគេស្រឡាញ់មនុស្ស ស្រឡាញ់ទាំងខ្មាំង សត្រូវទៀត។ ពួកគេអធិស្ឋានទៅកាន់ព្រះ ដូចជាឪពុកកូន និងមានទំនាក់ទំនងជាមួយព្រះអង្គ។ ពួកគេបម្រើព្រះ ដូចជាចៅហ្វាយ និងមានកំណប់នៅនគរស្ថានសួគ៌ ដោយសារតែការបម្រើនេះ។ ពួកគេយកព្រះជាទី ១ និងជឿទុកចិត្តព្រះអង្គថា ទ្រង់នឹងផ្គត់ផ្គង់តម្រូវការពួកគេ ជាងព្រួយបារម្ភ។ ពួកគេមិនកាត់ទោសអ្នកដទៃ តែព្យាយាមជួយមនុស្សវិញ ហើយពួកគេស្ដាប់ និងធ្វើតាមការបង្រៀន របស់ព្រះអង្គ។ នេះហើយ គឺជាជីវិតដែលមានព្រះយេស៊ូវ គង់នៅជាមួយ។

​

អធិស្ឋានបញ្ចប់

​